Wallpaper Januarie 2012

Smashing Magazine se Januarie wallpaper. 

Tasha's

Ek en my vriendin het ‘n heerlike kuiertjie ingewerk en middagete geniet by die sjiek Tasha’s in Brooklyn. 

Die spyskaart is onkonvensioneel met eksperimentele disse en die atmosfeer herinner aan ‘n straatkafee in New York.  Ek het soos ‘n regte yuppie gevoel – kompleet met ‘n Hazelnut Macchiato in die hand. 

The Rapture

Slapende Skoonheid

Almal in Fort 365 word ontwrig deur die bouery.

Ons moes vir ‘n tweede keer ons kamer ontruim, die keer vir pleisterwerk.  Mabena en span is besig om hulself goed van hul taak te kwyt met die Rhinolite, maar ons vloer lyk soos Pole na die Tweede Wêreldoorlog.

Kleinbrak moes ook haar lêplekkie prysgee, en moet die studeerkamer vir eers “huis” noem.  Dit lyk darem of sy steeds rustig slaap deur die chaos wat hier heers.

Die pienk kas

My eerste verfprojek was ‘n sukses!

'n Vaal kas het 'n make-over ondergaan met slegs 'n bietjie verf, skuurpapier, vernis en baie geduld.  Indien jy 'n soortgelyke projek wil aanpak moet jy besef dat dit nie in een dag afgehandel kan word nie, maar die eindproduk maak dit die moeite werd.

Let wel: Moenie hout verf nie, dit is kosbaar. Probeer eerder ‘n meubelstuk van saamgeperste hout of ‘n ander materiaal.

 Kas - voor die tyd

Kas - hoe dit nou lyk

Sjokoladekoekies

Die eerste resep van die Kook & Geniet wat ek uitgetoets het – en dit is vingerlek-lekker!

1 x koppie margarien

2 x koppies suiker

½ x koppie kakao

½ x koppie melk

3 x koppies hawermout

1 x koppie droeë klapper

½ x teelepel vanieljegeursel

Roer die eerste vier bestandele oor ‘n matige hitte tot die suiker opgelos het. Roer dan die orige bestandele by. Drup lepels vol op ‘n gesmeerde bakplaat.  Laat goed afkoel.

Kook en Geniet

Kersdag was ‘n fees!

Een van die hoogtepunte was die geskenk wat ek van my beminde ontvang het – watch out Julia Child!

Hy pleister soos 'n yster

Binne drie dae het Mabena ‘n derde van die pleisterwerk voltooi – so reguit dit intimideer ‘n waterpas.

Ek raak nou bitter opgewonde - ek het Dulux kleurkaarte begin versamel wat ek met groot ywer bestudeer.

Min dae…

Skaapboud

Die idee is om Kersdag ‘n feesmaal voor te berei wat bestaan uit skaapboud en aartappels, groenboontjies, pampoen en broccoli en blomkool in ‘n witsous met kaas.  Vir nagereg sal ons smul aan ‘n souserige sjokoladepoeding met room.

Dit klink al te heerlik, maar my planne word in die wiele gery.  Ek kry nie skaapboud nie: slaghuise in en uit sonder enige sukses.  Ek het vroeër ons kontak by die boeremark gebel om te hoor of hy hulp kan verleen, maar helaas.

Hoender is nou maar net nie ‘n goeie genoeg plaasvervanger nie.  

Christmas Shopping

WAARSKUWING: Vermy die winkels in Pretoria-omgewing ten alle koste.

• Geen parkering is beskikbaar nie.
• Die publiek se diere-instink is duidelik sigbaar in die stamp en stoot om voor uit te kom
• Die rakke is leeg
• Werkers is onbehulpsaam en uitgemergel
• Dit vat ‘n ewigheid om met ‘n paar sakkies huis toe te suiker

Hoender en perske bredie

500g x Hoenderborsies

1 x Ui

1 x Red Pepper

1 x Blikkie Perskes

1 x Koppie Water

1 x Pakkie Knorr Stew Granules

Paprika

Tiemie

Braai ui, red pepper en blokkies hoender en voeg paprika en tiemie by.  Gooi water en die sous van die perskes by en roer totdat die kook.  Voeg perskes en pakkie stew granules by.  Roer gereeld.  Laat dit prut vir ongeveer 20 minute.  Bedien saam met rys.

Ordinary Thunderstorms

Ek het die fout gemaak om twee boeke van dieselfde genre na mekaar te lees.  Met gevolg het Ordinary Thunderstorms deur welbekende en bekroonde outeur William Boyd my aanvanklik nie geboei nie.

Alhoewel, hoe verder ek gelees het, hoe beter het die storielyn geword. 

Die hoofkarakter, Adam Kindred, ervaar ‘n 360° omwenteling nadat hy op ‘n moordtoneel afkom.  Daar word ook interessante kommentaar gelewer op big business – in dié geval die farmaseutiese wêreld. 

Dit is die moeite werd om die boek enduit te lees, daar wag ‘n verrassing met betrekking tot die antagonis.

Van trou tot rugby

Die naweek was bedrywig met 3 verjaardagpartytjies en ‘n Kerspiekniek – ons is flou!

Ons het wel interessante mense ontmoet: onder andere ‘n jong paartjie wat September 2012 trou. 

Nie ‘n oomblik se stilte van Mnr. en (soon to be) Mev. X nie.  Ons ken elke aspek van hulle naweektroue in die fynste besonderhede.

Toe die tweetjies aangaan oor Bloubul- en WP-rugby het ek en my beminde net gesug en verduidelik dat ons nie sportaanhangers is nie.

Mnr. X vra toe vreeslik bekommerd: “Nou wat is julle belangstellings?”

Ons was uitgeboul. Volgens sekere mense het jy geen lewe sonder rugby nie.

Als wat mooi is

Dakbalke

My beminde lyk soos iets wat hoort in die Knysnabos met al die houtsaagsels wat vasklou aan sy lyf; as’t ware ‘n Outeniqua Geelhout in wording.

Met die hulp van sy broeder is daar Saterdag planne beraam en gewerskaf van sonsopkoms tot biersondergang.

Vandag is daar tot dusver geen teken van die bier nie, maar daar word getimmer en geboor en gekap aan die dakbalke met die wete dat die dae min is.

Gevulde Calamari Tubes

1 x koppie rys

1 x blikkie mossels

1 x fyngekapte ui

2 x fyngekapte appelkose

10 x calamari tubes

Kook rys en meng met mossels, ui en appelkose.  Vul die calamari tubes en gebruik tandestokkie om te verseker dat vulsel nie uitglip.  Braai calamari tot gaar.  Bedien met verskeidenheid souse.

Pinterest

Social Networking websites het die wêreld oorgeneem: Facebook, Twitter, Digg, Stumble Upon, Google +, Flickr en nog baie meer!

Ek vermoed ek het egter op die beste een afgekom: Pinterest.

Dié website is gebasseer op die visuele, eerder as op geskrewe inligting, wat natuurlik ure se kykgenot tot gevolg kan hê.  Inspirasie vir letterlik enige iets van hekelpatrone tot haardosse is te vinde.

Maar wees gewaarsku, hierdie kan ‘n tydrowende stokperdjie word en soos alle social networks is dit verslawend.

Trourok

Die eerste stap van die trourok is geneem.

Ek en my bekwame rokmaakster is winkel in en winkel uit en het eindelik die perfekte lap gekry.  Die patroon is opgetrek en ek is gemeet van my kroontjie tot my toontjie.

Met twee en ‘n half maande om te gaan tot die troue is dit seker ook nie ‘n oomblik te gou nie.

Nou die groot soektog na skoene…

The Girl Who Played With Fire

Die tweede boek in die Millennium-reeks deur Stieg Larsson, The Girl Who Played With Fire, verbeeld ‘n intrige met dieselfde karakters as The Girl With The Dragon Tattoo.

Dié keer val die klem nie slegs op moord nie, maar ook op ‘n ander misdaad wat in die ondergrond van Swede plaasvind: seksmisdrywe.

Salander is in die middel van hierdie bedrywighede vasgekeer met slegs Blomkvist om haar te help, om as’t ware sy skuld by haar te vereffen.

Die boek steek wel ‘n bietjie af teenoor die eerste een in die reeks in die sin dat dit baie lank vat voordat jy geboei is, maar dit is steeds die 569 bladsye die moeite werd.

Wallpaper December 2011

Smashing Magazine se Desember wallpaper.  Daar is baie mooies vir Kersfees.

James Levy and the Blood Red Rose

Nuwe kantoor

Met al die terugslae wat ons ervaar het is die bouery nou weer volspoed aan die gang.  Die tweede verdieping word met nuwe moed deur die bouers aangepak en ons is vasbeslote om dak op te sit voor die einde van die jaar.

Al is net die een muur van ons nuwe kantoor reeds gebou, sien ek ons werksplekkie met boekrakke teen die muur en die warm son wat ons lui maak teen laatmiddag.  En bowenal sien ek uit na ‘n kantoor wat skoon en netjies is – ons leef nou soos die karakters van Grey Gardens.

The Slap

Christos Tsiolkas se The Slap het groot opspraak gewek in skrywerskringe en is met vele pryse bekroon.

Tot my spyt het ek nie veel van die boek gedink nie. 

Die konsep is wel ‘n goeie een: ‘n kind word geslaan tydens ‘n braai deur ‘n man wat nie sy pa is nie.  Die vertellings is uit die oogpunte van karakters wat ooggetuies hiervan was.

Maar helaas, dit is vervelig, onkreatief en plat.  Ek dink as die verhaal meer bonkig vervat is sou ek anders gevoel het.  Sterkte aan almal wat die boek aanpak.

Kiekies

So paar weke terug het ons troufotograaf, Louis van Zyl, ‘n pre-wedding shoot gedoen.  
Dit is so ‘n blink idee om die fotograaf vooraf te leer ken – alle vrese en spanning word uit die weg geruim.

Ons was effe skrikkerig aan die begin (ek en my beminde, Kleinbrak is gemaak vir 'n kiekiemasjien), maar is baie in ons skik met die eindresultaat.

Gaan kyk ook hier vir nog foto’s.

Kleinblaartjie

Ons Saterdagaand was opwindend en uitputtend.  Ons bron van vermaak: Gian (2), Alexa (4) en Kleinbrak (7).

Die aand het bestaan uit balspeel, swaai, wegkruipertjie en smeek dat hulle mekaar nie met sand moet gooi nie.  Daar is op tafels gedans en gesnak na asem soos ons lag toe my beminde nie ‘n warm dingetjie oor Gian se kop kon kry nie. 

Met ‘n gesukkel is die kleuters pizza en Barney sappies gevoer.  Toe ek ‘n pizza-korsie vir hulle hondjie gee vra Alexa ewe verontwaardig: “Nou wat van Kleinblaartjie?”   

Ek kon nie help om haar ‘n vet soen en druk te gee nie!

Kat se blad

Chaos: nie kinders-harloop-in-die-huis-rond-en-breek-ornamente tipe chaos nie, absolute aardskuddende dis-‘n-reuse-gemors tipe chaos.

Die braaikamer se vloer sowel as die tweede verdieping se blad is met ‘n gestoei gegooi. 

Binne die eerste uur en slegs 18 vierkante meter verder het die sementpomp die gees gegee: let wel dat dit van die begin af maar hoes-hoes gegaan het en dat daar meer water en klip as enige iets anders uit sy tuit gespuit het.

Ses ure en drie sementtrokke, ‘n halfpyp van sinkplate en gebreekte plakkies en -gemoedere verder, is dié projek afgehandel.  

Werkers wag in spanning vir die tweede sementtrok.

Gestrand

Ek wens die woord gestrand het iets te make gehad met sand en see en warm dae, want glo my vry, ek sou enige iets gee om nou gestrand op die strand te wees.

Die teendeel is egter die geval.  Ons bakkie is in vir ‘n diens en daar is vermoedelik fout met onderdele waarvan ek niks kan uitmaak nie. 

Ek het geen intensie om iewers heen te gaan nie, maar die wete dat as ek sou wou in die pad val vir enige duistere rede en nie kan nie, is genoeg om my bors te laat toetrek. 

Dit is eintlik verskriklik om te dink dat mens so afhanklik geraak het van vier wiele – die goeie ou dae waar Voortrekkertannies kaalvoet oor die Drakensberge getrek het laat my skoon skaam kry.

Mercedes Benz Kuns

Ek is absoluut mal oor hierdie kiekie wat my geliefde vandag van ‘n Mercedes Benz bakkie geneem het.

Die kleure en komposisie herinner aan ‘n foto-uitstalling waar dames in kort swart nommertjies en mans in turtlenecks aandagtig die kuns bestudeer, wyl eksotiese drankies tydsaam bemin word.

Voëlvry

Ek skryf vanmiddag my laaste eksamen van die semester.

Need I say more?

Pot-Pourri

Die vertellings van die Paryse lewe is in tipiese Brink-styl met temas wat nie sommer in reisgidse te vinde sal wees nie.  Sketse van boemelaars, snaakse losies en arm kunstenaars is maar van die vreemde inspirasie waarmee André Brink Parys inkleur.

Brink se woordkeuses en vergelykings is uniek aan sy baanbrekerwerk in Afrikaanse prosa en sal altyd ‘n gunsteling bly.

Pot-Pourri is in 1962 uitgegee met sy laaste druk in 1967.  Indien jy êrens hierdie juweel kan opspoor (veral as hy ‘n stofomslag het), raai ek jou aan om vir hom ‘n plekkie te kry in jou boekrak.

“En dag vir dag staan die son skroeiend in die stil wit lig: nie die goue, milde son van die suide waar Van Gogh van kleure gek geraak het nie, maar ‘n boosaardige, bedrukkende vlambal wat genadeloos alle mure deurdring en die stad ‘n smeulende bakoond maak.”

We need to talk about Kevin

Kontakvorms op die interweb

As ‘n ontwerper wat ‘n voorliefde het vir printmedia, maak ek seker dat ek op datum bly van current trends.

Webtuistes aan die ander kant is vir my maar ‘n wyse van inkomste – ek hou daarvan om dit visueel aantreklik te maak, maar die tegniese deel daarvan verafsku ek.

Dit is nou juis met die coding waarmee ek al vir weke sukkel met twee bepaalde Flash webwerwe.  Dit blyk heel eenvoudig te wees om ‘n php dokument te koppel met die Flash coding, maar helaas.  Na ek hulp ingeroep het van heinde en verre sonder enige sukses, was my laaste opsie ons getroue vriend Google.

Wees nie bevrees: na lang ure se naels kou en ‘n onderlip wat bewe werk die vervlakste kontakvorm! 

Drie hoera’s vir Google!

Mid-week bederf

In die gejaagdheid van bou, werk, eksamen en troue reël is daar maar min tyd vir stilsit en ontspan.

Gisteraand het dit gevoel of ons die loterywenners is toe ons gesellig om ‘n vuurtjie kon sit en met nabetragting opinies lewer oor die afgelope week se verrigtinge.

‘n Heerlike stukkie rumpsteak is tot absolute perfeksie op die rooiwarm kole gebraai en dit is verorber saam met ‘n romerige mieliegereg.

Mieliegereg:

1 Blik Soetmielies

1 Koppie Melk

2 Eetlepels Maizena

3 Eiers

1 Eetlepel Botter

⅓ Teelepel Bakpoeier

2 Eetlepels Suiker

Knippie Sout

Meng alles saam en bak teen 180C tot ligbruin.

Google +

Kan iemand asb vir my ‘n goeie rede gee waarom mens ‘n Google+ rekening sowel as ‘n Facebook rekening moet hê?

Ek kan regtig nie sien dat Google+ die voorste sosiale netwerk sal word nie.

Deurbraak

Die kap en bou gaan fluks voort.   Ons het ons kamer ontruim en moes al die meubels, boeke en ornamente in die spaarkamer stoor en ons klere op dié se bed uitstrooi.  Die gevolg is ons matras is netjies op die sitkamervloer voor die televisie gegooi en daar kiep ons salig as die son sak.

Met ‘n getimmer en glad sonder ‘n enkele venster wat breek, is daar suksesvol deurgebreek vanaf die hoofslaapkamer na die pasgeboude badkamer.  Die badkamer se vloer is gegooi en die dak is op – dit is ‘n kwessie van dae voordat ek ‘n kokende borrelbad kan geniet.   

Hierdie is een van die hoogtepunte van die bouwerk!

The Iron Lady

Meryl Streep beter die Oscar huis toe vat vir die een!

Eksamen

Die jaar is besig om tot ‘n einde te kom.  Kersversierings pronk in elke winkelvenster, kinders raak opgewonde oor ‘n seevakansie en studente skryf eksamen. 

Ek het pas my eerste vraestel voltooi – die maklikste van die drie vakke. 

Hoewel die voorafgaande dae se geleerdery uitmergelend is, jou oë drie van als begin sien en jy nie jou nek kan beweeg van die überspasmas nie, is dit maar ‘n vulletjie vergelykend met die skrywery self. 

‘n Saal gepak met duisende stresbolle wat angstig notas vir ‘n laaste keer deurgaan en die agterkante van penne kou soos pandas aan bamboes, is die milieu vir die senutergende vraestel wat jou te wagte is. 

Indien jy die hitte van die saal kan deurstaan en dit tóg regkry om die eksamen te voltooi, is dit alles tevergeefs … jy kan nie uit jou sitplek opstaan nie.  Student A voor jou se stoel is styf teen jou beknopte tafeltjie gedruk, en sodra jy ‘n sentimeter agtertoe skuifel steur jy Student B aan wie se tafel jy stamp.

Dit is dan dus die rede vir die skaafmerke op my knieë: ek het onderdeur die tafel geglip.

Wallpaper November 2011

Smashing Magazine het maandeliks ‘n groot aantal desktop wallpapers van ontwerpers wêreldwyd wat wil naam maak.  Ek volg hulle vir die laaste twee jaar en daar is altyd ontwerpe wat my asem wegslaan. 

Kreatiwiteit, funsionaliteit en inisiatief word aan die dag gelê om dié wat die kunswerke aflaai te inspireer vir die komende maand.

Gaan kyk gerus na die wallpapers vir November 2011.

Another Earth

The Girl with the Dragon Tattoo

Wow!

Ek was aangenaam verras deur hierdie gekommersialiseerde boek.  Geen wonder almal is aan die gons oor die meesterriller deur Stieg Larsson nie. 

Die storielyn is intens met drie hoof drade wat teen die middel van die boek saamgevoeg word om die intrige te vervolmaak.  Die karakters is uniek, nie net in hulle voorkoms nie (veral Lisbeth Salander) maar ook in hul denkwyses.  Hoewel daar oomblike in die boek is wat baie wreed en eksplisiet is, is daar ook ‘n diep emosionele ondertoon.

Jy sal die boek nie wil neersit nie – The Girl with the Dragon Tattoo is ‘n definitiewe MUST READ!

Gesyferdheid

Ek is tans besig met die ontwerp van ‘n webwerf wat die oorsaak van slapelose nagte is.  Die kliënt verkoop ingevoerde en plaaslike speelgoed wat kinderboeke insluit. 

Daar is onder meer opvoedkundige boeke: Knip en Plak vir Graad R; Geletterdheid vir Graad 1; Gesyferdheid vir Graad 2. 

Gesyferdheid?  Gesyferdheid… Gesyferdheid!  Wie het dié woord opgemaak?  Dit ontstel my verskriklik!

Catemba

Die Portugese restaurant, Catemba, is weggesteek in Hildastraat, Hatfield.  Hoewel die dekor veel te wense laat, het die items op die spyskaart alle verwagtinge oortref. 

Die sappige hoender schnitzel wat ek bestel het is gestop met spinasie en deurdrenk met ‘n sampioensous wat geen gelyke het nie.  Jy wag ‘n bietjie langer vir die kos om voorberei te word, maar dit is elke hemelse happie die moeite werd.  Hulle gebruik vars produkte en is beslis nie skaam met die botter nie.

‘n Lekker plekkie vir ‘n verlengde middagete indien jy jouself in die omgewing bevind.

Splinternuwe sikspens

Ter voorbereiding van Saterdag se engagement shoot wat voorlê, het ek my gaan hare kleur (because I’m worth it).  Wat ‘n wêreld se verskil maak ‘n gepamperlang nie aan ‘n vrou se gemoed nie?  Geen grys drade wat meer vir my loer deur die vaal bruin hare nie. 

Ek lyk vir myself soos ‘n skoonheidskoningin met glansende donker hare wat gans soos Elizabeth vir die volk wil wuif!

Mary and Max

Ons het gister Mary and Max gekyk.  Die film deur Adam Elliot gebruik stemme van Toni Colette, Eric Bana en Philip Seymour Hoffman.  Dit is 'n absolute moet-sien!

Kleinbrak kap dit flou

Met die bouery saam het ons erf aansienlik gekrip.  Vir Smalldog is dit ‘n groter aanpassing as vir ons.  Gereelde uitstappies na die plaaslike parkie dien as ‘n redelike oplossing vir die pinarrie.

Met Smallies agter in die bakkie stop ons vir ‘n verversinkie.  Ek het letterlik jare laas ‘n King Cone geëet, en hoewel dit heerlik was – soos alle roomys maar is – het ek ‘n vraag oor hierdie produk te stel.  Het King Cones wel gekrimp, of het dit net baie groter gelyk toe ek ‘n astertjie was?

 'n Bitter gelukkige Kleinbrak

Of Love and Other Demons

Gabriel Garcia Marquez is ‘n skrywer duisend.  Behalwe vir innoverende storielyne, is sy woordkeuses en sinskonstruksies uitdagend.

In Of Love and Other Demons kombineer hy satire met nostalgie en word die metafoor van duiwels gebruik om die menslike instink te beskryf.  Daar is ook ‘n magspel tussen liefde en haat teenwoordig: dikwels toegeiën aan geld, seks en jaloesie.

Lees die boek indien jy ‘n iets wil aandurf wat buite jou gemaksone is.

Fabio die Flonker

Na ‘n lang oggend op die pad het ek besluit om vinnig by Irene Village Mall in te hardloop vir die nodige kruideniers by Pick&Pay.  Ek fnuik myself altyd om te dink ek gaan “vinnig” inkopies doen.

Vandag se afleiding het niks te doen gehad met hopelose diens of leë rakke nie, maar wel met ‘n Italianer en spieëls en ligte wat my soos ‘n superstêr laat voel het.  Wat ‘n frustrasie!

Ek het niksvermoedend die sentrum ingestap toe Fabio my voorkeer en my hare begin streel.  Hy ruk ‘n blink ding uit en toe ek my oë uitvee is die een helfte van my kop ‘n krullebol en die anderkant waterpas.  Teen slegs R3000 (wat later R2000 geword het) kan ek hierdie wondermasjien besit en ure se pret met my haredos hê.  I think not.

Nodeloos om die sê, ek was nog nooit so vinnig in en uit ‘n winkel nie – ek het gelyk soos iets wat ontsnap het uit die sirkus!

Kleure en geure

Dié was nou so mooi vir my – en dit ruik die ene basiliekruid!

Legkaart blad

Dit word nog gebou dat die biesies bewe in ons agterplaas – daar is nie meer plek vir ‘n muis nie.  Die braaikamer se blad van rib and block is op.  Heee haaa!!  ‘n Interessante konsep, dit werk soos ‘n legkaart: linthols en ander sementblokke pas inmekaar om ‘n blad te vorm. Sodra die ingenieursketse reg is sal ons sement kan gooi en gaan fase twee (kantoor en woonstel) aangepak word. 

Daar staan yslike pale die braaikamer vol wat die linthols bo hou – my beminde loop met gemak daar rond, maar ek het ‘n kollosale vrees dat die hele spulletjie op my gaan neerstort.  Hierdie tipe goed gebeur graag met my: verlede week het ek niksvermoedend pêns-en-pootjies in ‘n sloot geval.  Letterlik dan nou deur die aarde ingesluk.  

 Al die stukke pas inmekaar

Die groot vou

In my opinie is uitnodigings van die belangrikste trou-items: dit is ‘n voorsmakie van wat alles wag op die gaste vir die groot dag.  Na vele frustrasies met die drukkers het ek die finale produk ontvang, ‘n week en ‘n half agter skedule. 

Met die ontwerp van die kaartjie moes in ag geneem word dat die troue prettig, ontspanne en speels gaan wees, ‘n redelike uitdaging vir iemand wat deesdae net korporatiewe identiteite ontwerp. 

Die uitnodiging is gebasseer op ‘n “kwêkkie” van ouds: kies-‘n-kleur-en-‘n-nommer-dan-sê-ek-vir-jou-wat-is-jou-lot!  Baie gepas vir die geleentheid, maar helaas, daar moet 60 uitnodigings gevou word.   Ek het vanoggend een gevou en sit reeds met drie paper cuts. 

Oh joy! 

Trek jou dansskoene aan!

Dopeiers word flopeiers

Dat vroue kan multi-task is ‘n absolute mite.  

Ek kan nie middagete voorberei en ‘n deadline vir ‘n kliënt haal nie.   

Hier is die bewyse.

Flopeiers

Braaibroodjies

Sondaemiddae is sinoniem met braai by Fort 365.  Hoewel ons nog nie ons nuwe braaier kan gebruik nie, het my beminde ‘n staatmakerbraaier groot genoeg vir twee mense se bederf.  ‘n Sappige kruisskyf is op die kole gegooi en daarna die braaibroodjies met bladjang, uie, tamatie en kaas wat drup in die vuur en smelt in jou mond.  Ons het gesmul aan die koningskos terwyl ons gebak het in die Pretoria somerson.  

As ek my sin kon kry sou daar ten minste twee Sondae in die week gewees het.

 Koningskos

Doctor Zhivago

Die Oscar-bekroonde film Doctor Zhivago, met Omar Sharif en Julie Christie, is welbekend aan die publiek. Ek was bitter opgewonde toe ek ontdek dat die roman voorgeskryf is vir my studies vir hierdie semester.   

Die outeur, Boris Pasternak, het in 1959 die Nobel-prys vir Literatuur ontvang vir Doctor Zhivago, maar weens politieke omstandighede in Rusland moes hy die toekenning prysgee.

Die boek handel oor Yury Andreyevich Zhivago gedurende die Eerste Wêreldoorlog en die Russiese Rewolusie.  In die oorloggeteisterde milieu leer ken die leser Yury as ‘n saggeaarde mediese dokter wat sy dienste aan sy vaderland bied, ‘n individu opsoek na liefde en sy innerlike konflik as kunstenaar (skrywer).

Doctor Zhivago is ‘n literêre juweel wat jou persepsies oor regverdigheid en liefde sal bevraagteken.

“They loved each other greatly.  Most people experience love, without noticing that there is anything remarkable about it.  To them – and this made them unusual – the moments when passion visited their doomed human existence like a breath of timelessness were moments of revelation, of ever greater understanding of life and of themselves.”

“And when the war broke out, its real horrors, its real dangers, its menace of real death, were a blessing compared with the inhuman power of the lie.”

We wish you a merry Christmas

Ek moes vanoggend gou winkel toe gaan vir vars brood en melk, nie een van my gunsteling uitstappies nie.  Met ‘n mandjie in die een hand en handsak oor die skouer pak ek die ekspedisie met ‘n drafstap aan.

Nes ek die bakkery instap vang my oog ‘n tafel met lekkernye (ek en my beminde is beide te lief vir lekker eet, so hier faal ek dikwels).  Maar helaas – geen melkterte, kolwyntjies of beskuit in sig… kan dit wees? Vrugtekoek en Krismispoeding oordadig versier met blink sterre en blinker tinsel.  Dit is Oktober en ek probeer nog ‘n oomblik inwerk om die Lente te vier.

Trek maar jou spaarvarkie nader, die tyd vir geskenke uitdeel is aansienlik nader as wat ons gedink het.

'n Taai gemors

Terwyl ek besig was met ‘n geurige kerrie (van die Oriental Plaza), het ek gemeen dat perske-stukke ‘n heerlike nagereg sal wees.  Hoewel ek nie graag geblikte proviant voorsit nie, versamel ek die leë blikkies vir ons troue (ek herwin dan dus as’t ware).

Met die derde draai gly die blikoopmaker en is 3mm van die blik se deksel steeds geseël.  Die vyfde draai gebeur dieselfde.  Die begin/eindpunt kry ek nooit van mekaar geskei nie.  En hier bevind ek myself met ‘n tammelêtjie: ‘n ronde blik deskel wat plek-plek nog vas is.  
‘n Stemmetjie in my kop reken dat jy met geweld enige iets kan regkry.  Soos ek die deksel met mening in die blik inslaan sien jy net taai perskesous spat!  Daar is sous op die venster, daar is sous op die vloer, daar is sous op my gesig en tussen my tone – ek plak vas op die vloer soos ek spartel vir ‘n lap om op en af te vee…

Koo; right now you are so not the best I can do –  ek het ‘n sny op my vinger as bewys daarvoor.

Sizzle Sizzle

Die bouers is 07:00 op hul pos.  Kap kap kap.  Bou bou bou.  Kap kap kap. Teen 17:00 wat hulle huis toe suiker is ons flou met ‘n dowwe hoofpyn en keelseer wat slegs deur fyn stof en sement veroorsaak word. 

Maar wees nie bevrees!  Toe ek gister inspeksie gaan doen van die dag se werk, gee my hart ‘n bokspring: dit is in!  Die belofte van intieme kuiers, skaaptjoppies en braaibroodjies en ‘n vuurtjie om jou hande by warm te maak in die bitterkoue wintermaande.  

 Die braaier wat vir drie jaar in die motorhuis gestoor is.  Wat 'n blye dag!

Pasta à la…

As ‘n kos(maak)liefhebber durf ek dikwels nuwe konkoksies aan – maar bittermin vanaf ‘n resep.  Dit was vandag weer een van dàài dae in die kombuis.  Ek gee vir julle: Pasta à la oh-my-greatness-I-think-I’m-going-to-have-a-heart-attack-but-it-is-so-worth-it!

• 3 handevol tricolour strikkie pasta
• 1 ui, in ringe gesny
• 1 eetlepel knoffel
• 1 pakkie spek, groot stukke gesny
• 1 pakkie swart sampioene, groot stukke gesny
• 500ml vars room
• Oreganum, Basiliekruid en Swart Peper na smaak

Kook die pasta tot byna sag terwyl jy die ui, knoffel, spek en sampioene braai.  Gooi dit saam in ‘n pot en voeg die room en speserye by.  Laat dit vir ongeveer 45 minute prut op ‘n lae hitte.  Bedien met fyn gerasperde kaas en paprika vir kleur.

Ons het geëet dat ons lê – not for the faint hearted.

 Pasta bederf

Mike (Ek byt jou oor af) Tyson

Ek het my muf gelag hiervoor:

Linthols en Brickforce

Almal het ‘n redelike idee van fondasies, bakstene en sement – gooi hierdie elemente saam met ‘n bouer en voila! jy het ‘n huisie!  

Ek het my liederlik misgis.

Na vyf weke se grondwerke is die staal gevleg en kon die fondasies vir ons aanbouings gepomp word.  Verlede week is daar eindelik met die fisiese bouwerk begin.  7000 mamparra bakstene en 5000 claret bakstene later is ons byna klaar met die braaikamer en terrasmuur (my beminde reken ons is 40% klaar  – Hoera!).  Ek kan nou met trots sê dat ek weet wat ‘n linthol, brickforce en conduit tubing is.

Ons huis is vuil en deurmekaar, daar lê grawe en pikke in die eetkamer en 12 sakke sement op die voorstoep.  Om elke hoek en draai is daar ‘n hammer of ‘n waterpyp of ‘n kragboks. 

Ek droom van die dag dat ons kan begin met die dekor!

 Trappe wat lei na ons nuwe kantoor

My mamsie

My moedertjie het Vrydagoggend gehoor dat sy die lank pad vanaf Stilbaai na Potchefstroom moet aanpak vir werk tydens Aardklop.  Met dié stop hulle toe ook gistermiddag in Pretoria en het ons die geleentheid gehad om ‘n vinnige kuiertjie in te werk. 

‘n Ma is ‘n fantastiese skepsel.  Die onvoorwaardelike liefde en absolute blydskap waarmee sy jou omvou het geen gelyke nie. Jy voel weer soos ‘n kind in haar arms – afhanklik van haar sagte bors, haar bekende hande en die trots in haar oë.  Jy is hare.

…Ek wens sy was net so ‘n bietjie nader…

Boeretroos by die Boeremark

Sedert ons kennismaking met die Boeremark by die Pionier Museum vroeër die jaar, kan ons nie die reuk van pannekoek, braaivleis en vars produkte op ‘n Saterdagoggend weerstaan nie.  Talle Pretorianers ondersteun weekliks die entrepreneurs wat nie slegs voedsel vir die ligaam verkoop nie, maar ook voedsel vir die siel bied.

Produkte wat ons graag koop sluit in: skaapribbetjies; hoenderpastei; kolwyntjies en ystervarkies; en gerookte koedoewors met kaas. Die hoogtepunt van die uitstappie bly vir my die Kahve koffie by die Koejawel stalletjie.  Nadat ek byna al die geure uitgetoets het kan ek met sekerheid sê dat die Macadamia Latté voorwaar die gunsteling is.  

Hazelnut Latté (Twee slukkies later)

Here comes the bride

Ons het Julie verloof geraak en beplan die bruilof vir Februarie 2012.  Terwyl my beminde aandag skenk aan werk om ons aan die lewe te hou, ‘n oog hou oor die aanbouings wat in ons agterplaas plaasvind – oor die algemeen dus Superman te wees – speel ek troue-troue.

Die groot goed het ek redelik onder beheer: die venue, fotograaf en musiek is in plek.  Met ‘n toertjie of twee behoort ek volgende week die uitnodigings te kan finaliseer en teen die einde van die maand ‘n redelike idee van my aksiepakkie te hê.  Opwindende tye – maar nie sonder uitdagings nie.  Ek het ‘n redelike hoë standaard om te handhaaf: my ouma was Bruid van die Millennium!

 Verona Stella Posthumus

Welkom by my blog!

Die gogga het my gebyt tydens die geliefde film Julie & Julia.  Meryl Streep het my op die punt van my stoel gehad as die kookgodin Julia Child, maar dit was Amy Adams as die blogger Julie Powell wat my eindeloos inspireer het. 

Na maande se oorweging het ek alle twyfel by die agterdeur uitgegooi en die groot stap geneem.  En hier is dit: Pietersielie, my blog, my boeuf bourgignon.