Brink bly briljant, en dié roman is die beste een wat ek nog van hom teëgekom het.
Die verhaal vertel die storie van Hanna X, 'n Duitse vrou wat in die vroeë 1900's na Suidwes-Afrika gegaan het - baie vroue is in hierdie tyd oorgestuur om te dien as huishulpe en selfs as vroue vir die Duitse soldate wat daar gestasioneer was. Maar met haar aankoms besef sy dat dit nie die land van palmbome is waarvan sy gedroom het nie, maar 'n nagmerrie wat geen vrou haarself kan indink nie.
Hanna word haar lewe lank onderdruk en mishandel deur mans, en in die nuwe land ervaar sy 'n laagtepunt. En dan kom die wraak.
Brink skryf 'n liriese boek oor 'n ondraaglike tema en slaag daarin om die leser te boei van begin tot einde, ademloos in die gebeure asook sy skryfstyl en taalgebruik.
"Die huis. Eerder 'n uitgroeisel van die aarde as 'n huis. Geplaas in 'n landskap uit die Ou Testament, 'n maanlandskap, 'n droomlandskap."
No comments:
Post a Comment